Sa gitna ng gulong at ikot ng ehe,
Narinig niya ang huni—
Sumasabay sa taginting ng liyabe,
Sa langitngit ng turnilyo,
Sumisingit sa angil ng makina,
Pilit sumasapaw sa singasing.
Nasa loob ng pabrika ang ibon?
O nasa labas? Nakadapo sa kapok
Malapit sa tarangkahan, o salabid
Ng kawad ng telepono at koryente.
* * *
Ang huni, musika sa gitna
Ng kalampagang sintunado,
Tila naghahanap ng akmang ritmo
Upang makabuo ng isang siklo.
Saglit niyang pinatay ang makina,
Nagkunwaring maninigarilyo sa labas,
Hanap ang ibon. Walang nakadapo
Sa punong kapok, wala sa salabid
Ng mga kawad. Ninamnam niya
Ang himig na nananatili sa hininga;
Nang biglang umambon, dumapo
Ang tikatik sa mga kable, naglambitin
Sa mga sanga, naglandas sa pader
At tuluyang lumagaslas sa bambang.
* * *
Inilahad niya ang mga palad
At ipinanghilamos ang ulan,
Binanyusan ang tainga
Na naghahanap ng musika
Sa salimbayan ng mga ingay.
At bago pumasok sa loob
Ng pabrika, bago muling
Paandarin ang makina,
Naihimig niya ang mga unang
Titik ng isang limot na awit.
