at nakarating din kami dito sa kabila
ng nagbabagang opinyon na may paraan
para turuan ang asong tumanggi sa buto
--
sa kaibuturan ng nagbabanggaang opinyon
kaugnay ng kung ano’t wala sa uso
tulad ng naglalahong panghalip panao
--
isa dalawa tatlo ang konseptong nakakalbo
apat lima anim ang tumawid sa dilim
sampu ng lahat ng inakalang mangyayari
--
nagbabago ang opinyon ayon sa init
ng pagkahon sa balangkas na naglaho
ang kabuluhan sa bulusok ng panahon
--
maláy natin ang bisagrang nag-uugnay sa málay natin
sa kabila ng pagtanggi mong kumagat sa buto
ng mga usapang nanghihingi ng opinyon
--
sa kaibuturan sa init sa kabila ng
sa balangkas sa malay natin sa dilim
sa halip na isa, narito ang isa pang akala
