Ang gusto ko talaga noon, maging journalist.
Laging nasa eksena, naghahatid ng balita,
Nakabuntot sa pulitiko, sa artista, sa terorista.
Exciting siguro ang makidnap ng Abu Sayyaf
o ang ma-hostage ng senglot na nag-aamok
at pagkalipas ng drama, pakakawalan din
kapalit ng tiket sa barko pauwi ng Leyte.
Mapanganib pero langit, if you lived to tell
about it. Sa harap ng kalamidad ng tao’t kalikasan,
Sa gitna ng putukan, sa piling ng mga aswang.
Habang mariin akong tumitipa ngayon
sa keyboard, ginugutom ako ng amoy
ng nilulutong balita ng nag-aalburutong bulkan.
At kung minamalas, may umuusok na ring
mga bungo ng sibilyan, o ng mga taga-media
na pinaulanan ng tingga. Mapanganib pero langit,
if you died serving the sizzling plate of truth
sa hapag-huntahan ng nagugutom na republic.
Pero aaminin ko, lately na-disillusion ako.
Ika nga, death wears many faces pero
meron din talagang hindi na mamukhaan,
at takot akong isuot ang mukhang iyon
one bright afternoon sa aking adventure.
Nakakawala ng bayag pagmasdan silang
literal na nawalan ng bayag, minachine gun.
Media man. Tagapamagitan. Kaya siguro
sa gitna nila pinuruhan. May mensahe
ang pamahalaan: ’tang ina mo sige gumitna
kang hindot ka. Babala sa mga mahihilig
umeksena. Mas malagim kaysa pantasya.
Hindi laging nakikita ang mga babala
ng trahedya, gayong trahedyang talaga
ang makakita. Sumusuot ang nagbabagang
balita sa aking mga mata, at walang laban
ang uusalin kong salita. Maliban na lang
kung ililimbag sa papel, papalamanan ng bato
saka iiitsa na tila mitsa ng pagbabago ang dila.
Ang nakababahala, madalas sumasabog kaagad
ang bomba sa ating palad bago pa maipahayag.
Kaya ngayon, iingatan kong huwag agad pumutok
ang mga himutok sa nagsasaknong na hugpong
ng mga tanong sagot bugtong bugtong saan
hahangtong ang aking tangka. Talagang mahirap
tumula. Mailap ang mga parikala’t talinghaga.
Siguro nga, magigising lang ang tunay na tula
kapag tulog na ang maingay na balita.
Kapag tumigil na ang pagbusina ng poot,
takot at lungkot sa aking gulugod,
saka pa lamang ako makabubuntot
sa convoy ng mga makatang walang-kabang
sumusugod. Heavily-armored ng mga taludtod.
