Poetry Issue 9

   Issue # 9: January-June 2008

Allan Popa



Dahil Napapanahon


      Ang susunod na makasasalubong
      nais kong yugyugin sa balikat at sabihan,

      Mabuti para sa iyo ang sining.
      Mabuti para sa iyo ang sining,

      ang nasasabi ko na lamang sa sarili
      habang tinatanaw ang likuran ng nagdaan.

      Estranghero, bakunang nabubuhay
      sa aking bisig, kagat ng langgam

      na dinaramdman ng buo kong katawan,
      paano ako lilikha ng pananggalang

      laban sa aking pagmamalasakit sa iyo?
      Sining na naging mabuti sa akin,

      karamdaman na walang lunas kundi sining.
      Estranghero, hindi ako mabuti para sa iyo.