Poetry Issue 9

   Issue # 9: January-June 2008

Allan Popa



Ang Huli sa mga Huli


      Pagkalipas ng mangingibig, pagkaraan ng estranghero

      pagkatapos ng Diyos

      saan ngayon
      babaling?

      Sadyang ang bawat pagtatangkang tumula
      ay suliranin ng paghahanap
      ng patutungkulan,

      sa bawat pagharap sa blangkong papel

      nakakubli itong pag-aasam na may nagkukubli
      sa likod ng kawalan:

      isang mukhang tahimik na sumasabay sa iyong pagbilang

      ang maaaring bumulaga anumang sandali
      upang unahan ka sa pagtakbo patungo sa pinagmulan,

      katulad mo, takot lamang na muling mataya.