Gusto kong isiping ako ang unang nakakita
Sa kaniya: isang babaeng walang suot
At hiya na humakbang sa gitna ng madla.
Nagsunuran sa aking titig ang lahat ng
naroon.
Nagbulungan. Ngunit tumahimik nang biglang
Magsalita ang babae at winika: Ngayong
nahuli ko
Ang inyong pansin, huhubarin ko ang
parikala.
Umugong muli ang malagkit na malisya.
Ano pa nga ba ang tatanggalin niya sa
kahubdan?
Payat na payat ang babae. Tuyot ang mga
suso.
Banaag sa lawas ang kaniyang kalansay.
Mababakas ang hilom na hiwa sa sinapupunan.
Yumuko ang babae at hinaplos ang hubog
Ng kaniyang katawan mula paanan, paitaas
Hanggang mahubad ang manipis na kasuotan.
Namangha ang lahat sa hawak niyang saplot
Na walang pinaglayo sa balot ng bagong
Silang na sanggol o bestida ng mangingibig
Na marahang lumalapit sa kama ng pagtatalik.
Tumahimik muli ang nakaligid na manonood.
Nasa akma siyang muling magsasalita.
